Þjóðskáldið séra Matthías Jochumsson setti ríkan svip á samtíma sinn —með ljóðum sínum, sálmum og leikritum, ritstjórn þjóðmálablaðs og með þýðingum bókmenntaverka og fræðigreina úr ýmsum tungumálum. Óhætt er því að segja að séra Matthías hafi verið meðal helstu áhrifavalda íslenskrar menningar á síðari hluta nítjándu aldar og í upphafi tuttugustu aldar. Verk hans voru ekki flöktandi skuggar á vegg heldur ristu djúpt í vitund þjóðarinnar.
Hvernig mótaðist hinn litríki hugarheimur séra Matthíasar? Þeirri spurningu er leitast við að svara í þessari fróðlegu bók dr. Gunnars Kristjánssonar, fyrrverandi prests á Reynivöllum.
Matthías var vakandi um strauma og stefnur á sinni tíð. Hann fylgdist vel með því sem var að gerast á meginlandi Evrópu og vestanhafs, hvort sem var á vettvangi stjórnmála, hugmyndafræði eða bókmennta. Gunnar rekur þá sögu skilmerkilega og staðnæmist meðal annars við hina gróskumiklu hreyfingu guðfræðinga og bókmenntamanna á austurströnd Bandaríkjanna sem þekkt er undir heitinu transendentalismi.
Gunnar skoðar áhrifavalda Matthíasar í víðum skilningi og fjallar meðal annars um uppeldi hans, erfðir, menntun og viðfangsefni samtímans. Hann leitar fanga í hinu víðfeðma höfundarverki séra Matthíasar —sendibréfum, prédikunum, ritgerðum, skáldverkum, þýðingum og síðast en ekki síst bundnu máli, ljóðum og sálmum. Allt opnar það leiðina að skáldinu og býður upp á gjöfult ferðalag um gróskumikinn hugarheim.
Innbundin – 304 bls.
Útgáfuár: 2020