Allir þekkja nafn eiginkonu Jóns Sigurðssonar. Hjónin Jón og Ingibjörg eru eitt í hugum flestra. En fáir vita hver Ingibjörg var í raun.
Var hún konan á myndinni frægu sem situr við hlið eiginmanns síns, glæsimennisins Jóns Sigurðssonar, nýflutt til Hafnar árið 1845, þreytuleg og niðurdregin á svip? Eða konan geðþekka og unglega á mynd sem var tekin um líkt leyti og prýðir kápuforsíðu þessarar bókar?
Óhætt er að segja að fyrri ljósmyndin hafi mótað hugmyndir landsmanna um Ingibjörgu Einarsdóttur – konuna sem sat tólf ár í festum.
Í þessari bók er varpað nýju ljósi á ævi og umhverfi Ingibjargar, Reykjavíkurdömunnar sem varð borgarafrú í Kaupmannahöfn. Hverjar voru rætur hennar? Hvernig heimili hélt hún í Kaupmannahöfn? Hvernig eiginkona var hún? Hvaða störfum sinnti hún í önn dagsins?
Tímabær bók um svipmikla konu sem löngum hefur staðið í skugga eiginmanns síns.
Innbundin – 312 bls. + 32 myndasíður
Útgáfuár: 2011