Bandaríkjamaðurinn Dwayne Koster var heillaður af örlögum landa síns, tónlistarmannsins Jims Sullivans sem nánast gufaði upp í eyðimörkinni í Nýju-Mexíkó í marsmánuði 1975. Ekkert hefur spurst til hans síðan þá og engar vísbendingar hafa komið fram um hvað af honum hafi orðið. Dwayne ákveður að stytta sér aldur á sömu slóðum og síðast sást til Jims Sullivans. En þessi skáldsaga segir líka aðra sögu og það er saga hennar sjálfrar og hins uppdiktaða höfundar hennar sem bætir sífellt við litlum bútum í frásögnina og hylur þannig mörk sögunnar móðu. Má því segja að í þessu verki Tanguys Viels felist tvíþætt svar — bæði tilvistarlegt og fagurfræðilegt — við spurningunni um endalok.
Jórunn Tómasdóttir þýddi.
„Skopstæling Tanguys Viels á „amerísku skáldsögunni“ er þaulhugsuð og fetar nýjar slóðir; hún segir sögu í sama mund og hún vekur spurningar um frásagnagerðina sem hún lýtur.“ – The French Review
„Skrif Tanguy Viel heltaka lesandann.“– Libération
Franski rithöfundurinn Tanguy Viel fæddist í Brest á Bretaigne-skaga árið 1973. Hann er höfundur nokkurra skáldsagna og hefur hlotið mörg helstu bókmenntaverðlaun í heimalandi sínu, svo sem Prix Fénéon, Prix littéraire de la vocation, Grand Prix RTL-Lire og Prix François Mauriac. Hann býr nálægt Orléans í Frakklandi.
Kilja – 182 bls.
Útgáfuár: 2022