„Vantar harðduglegan starfskraft í sauðburð í vor ...“
Ég skrifaði og spurðist fyrir. Sú sem svaraði var Elínóra. Hún gaf mér upp símann sinn og við ræddum saman símleiðis um launamál og aðstæður á bænum. Ég var ráðinn.
Svo hélt ég af stað sem leið lá.
Auðvitað fylgdi ekki auglýsingunni að dvölin ætti einna helst eftir að líkjast því að sitja undir sverði sem hangir á einu hrosshári, bundnu við sverðhjöltun, yfir höfði fólks og getur fallið á hverri stundu og valdið bráðum bana ...
Mig gat ekki órað fyrir hvað ég hafði komið mér út í.
Ég vissi ekki að bærinn líktist meira forn-grískum harmleik en venjulegum íslenskum bóndabæ.
„Besta bók sem ég hef lesið á árinu.“ – Uggi Jónsson
„Hermann er höfundur sem kemur ævinlega á óvart, fær lesandann til að endurhugsa og í Sauðburði má sjá nýjan tæran tón, glettinn og þó innilegan. Þetta er sannarlega bók sem verðskuldar að vera lesin oft!“ – Ármann Jakobsson
„Hermann er góði hirðirinn sem eins og allir góðir rithöfundar finnur sögurnar sem lúra í samfélaginu, hjálpar þeim til ljóssins og lestrarins svo að þær geti borið burt syndir heimsins.“ – Guðmundur Andri Thorsson
„Sauðburður er mögnuð saga ... Hermann hefur einstakt lag á að finna hversdaginn í því tímalausa og stóra. Hann minnir okkur á að allt undir himnunum fjórum er á dýptina og að, einsog máltækið segir, fiskur er fiskur en kjöt er matur.“ – Gímaldin
„Ég á margar uppáhaldsbækur og flestar þeirra eru eftir Hermann Stefánsson. Hermann skrifar ekki sömu bókina tvisvar! Bækurnar hans koma alltaf á óvart, bæði hvað varðar sögurnar sjálfar og frásagnarmátann. Í þessari nýju bók fer hann enn á nýjar slóðir. Sögumaður vinnur við sauðburð á stóru fjárbúi og lærir margt af samverkafólkinu, ekki síst íslensku! Það er forvitni höfundarins um lífið og hvernig fólk lifir því, sem knýr söguna áfram og gerir hana áhugaverða og ferska.“ – Ragnheiður Ólafsdóttir
Innbundin – 140 bls.
Útgáfuár: 2026